Fara beint í efni
Á þessari síðu

Reglur

Sjálfvirkar reglur sem úthluta, merkja, breyta stöðu eða loka málum á grundvelli skilyrða sem þú setur.

Reglur sjálfvirknivæða endurtekin handtök. Í stað þess að flokka og úthluta hverju máli handvirkt lætur þú Elvo gera það. Hver regla skoðar mál þegar það berst (eða breytist) og framkvæmir aðgerð ef skilyrði eru uppfyllt.

Reglur stilltar undir Stillingar → Reglur.
Reglur stilltar undir Stillingar → Reglur.

Hvernig regla virkar#

Hver regla er einföld jafna: skilyrði → aðgerð.

  • Skilyrði — hvenær reglan á að virkjast. T.d. „efni inniheldur reikningur“, „mál barst á tölvupóst“, „sendandi er með lén @samskip.is“, „utan opnunartíma er já“, eða sambland af mörgum skilyrðum.
  • Aðgerð — hvað á að gerast. T.d. úthluta á teymi eða starfsmann, breyta stöðu, bæta við eða fjarlægja merki, eða loka málinu.

Ein regla getur haft mörg skilyrði og margar aðgerðir.

Búa til reglu#

  1. Opnaðu Stillingar → Reglur og smelltu á Bæta við reglu.
  2. Veldu skilyrðin sem kveikja á reglunni.
  3. Veldu aðgerðirnar sem eiga að framkvæmast.
  4. Vistaðu. Reglan tekur strax gildi á nýjum málum.

Reglum er raðað og þær keyra ofan frá og niður, svo röðin getur skipt máli.

Dæmi um gagnlegar reglur#

  • Beina eftir efni — mál sem innihalda „pöntun“ fara sjálfkrafa til afgreiðsluteymis.
  • Forgangsraða lykilviðskiptavinum — mál frá tilteknum lénum fá merkingu og fara fremst.
  • Loka sjálfvirkum tilkynningum — staðfestingar- og kerfispóstar merkjast lesnir og lokast strax svo þeir trufli ekki innhólfið.
  • Svar utan opnunartíma — skilyrðið Utan opnunartíma er Já, aðgerðin Senda sjálfvirkt svar. Hvert erindi, hvort sem það er tölvupóstur eða netspjall, sem berst á meðan lokað er (á kvöldin, um helgar og í hléum sem þú hefur skráð, t.d. í hádeginu) fær fasta svarið þitt um opnunartíma. Opnunartíminn sjálfur er skráður undir Stillingar → Fyrirtæki → Opnunartími, þar sem hver dagur getur haft fleiri en eitt tímabil, t.d. 09:00–12:00 og 13:00–17:00 til að loka spjallinu í hádeginu. Fyrirtæki án skráðs opnunartíma er aldrei „utan“ hans, svo reglan gerir ekkert fyrr en opnunartími hefur verið skráður.

Senda vefkrók#

Aðgerðin Senda vefkrók sendir samtalið á vefslóð sem þú velur þegar reglan á við — t.d. á make.com, Zapier eða ykkar eigin forrit sem á bara að bregðast við hópbókunum en ekki öllum samtölum.

  • Hvað er sent: JSON-beiðni (POST) með type: "rule.matched", auðkenni og heiti reglunnar, samtalinu og skilaboðunum frá viðskiptavininum sem reglan átti við (sömu conversation- og comment-hlutir og í vefkrókum API-sins), og is_new_conversation, sem er true þegar skilaboðin hófu samtalið — notaðu það ef þú vilt bara bregðast við fyrstu skilaboðum.
  • Hvenær: við hver ný skilaboð frá viðskiptavini sem reglan á við — fyrstu skilaboð og framhaldsskilaboð — í tölvupósti, Messenger, Instagram, WhatsApp og öðrum rásum, og við fyrstu skilaboð í netspjalli. Aldrei við ykkar eigin svör, innri athugasemdir, sjálfvirk svör, rusl (líka það sem pósthólfið setur í ruslpóstmöppu) eða innfluttan eldri póst, og aldrei þegar reglan er keyrð á fyrirliggjandi samtöl. Ef skilaboð berast í pósthólf fleiri teyma og hvert teymi fær sitt samtal, sendir hvert samtal sinn vefkrók.
  • Undirskrift: þegar þú vistar regluna býr Elvo til undirskriftarlykil sem birtist á aðgerðinni ásamt afritunarhnappi. Hver beiðni er með hausana Elvo-Webhook-Id, Elvo-Webhook-Timestamp og Elvo-Webhook-Signature, undirrituð alveg eins og vefkrókar Elvo — sjá Verify signatures í API-skjölunum.
  • Endurtekningar: vefslóðin þarf að svara með 2xx innan 10 sekúndna. Annars reynir Elvo aftur, alls 3 sinnum; id beiðninnar helst það sama svo þú getur hunsað tvítekningar. Svar með 4xx (nema 408 og 429) er ekki reynt aftur. Eftir 25 misheppnaðar sendingar í röð er gert hlé á vefkróknum og reglan sýnir viðvörun; vistaðu regluna til að byrja aftur.
  • Takmörk: í mesta lagi 10 vefkrókar á klukkustund fyrir sömu reglu og sama samtal, og 300 á klukkustund fyrir hverja reglu, svo ferli sem óvart sendir aftur inn í Elvo getur ekki farið í endalausa lykkju.
  • Aðeins stjórnendur geta bætt við vefkrók eða breytt vefslóð hans og aðeins þeir sjá undirskriftarlykilinn.
  • Vefslóðin þarf að vera opinber https://-slóð og hver regla getur sent í mesta lagi 3 vefkróka.

Ábending

Byrjaðu með eina eða tvær einfaldar reglur og bættu við eftir því sem þú sérð hvaða handtök endurtaka sig.

Algengar spurningar#

Geta reglur sent svör til viðskiptavina? Já — t.d. sjálfvirkt móttökusvar. Notaðu það sparlega svo svörin verði ekki vélræn. Sjálfvirkt svar er sent einu sinni á hvert samtal, aðeins við fyrstu skilaboðin, og aldrei sem svar við öðru sjálfvirku svari.

Gilda reglur um netspjall? Já. Reglur keyra líka á fyrstu skilaboðum í spjalli, með rásarskilyrðið stillt á Spjallþjónn. Aðgerðir sem eiga ekki við gest sem bíður í beinni (rusl, blundur, geymsla, áframsending tölvupósts) er sleppt fyrir spjall; sjálfvirkt svar, merki, úthlutun og staða gilda.

Hvað ef tvær reglur stangast á? Þær keyra í röð ofan frá; efsta reglan ræður ef þær snerta sömu aðgerð.